0

Grûmpùtùrnier Spengler Cup

Gottéron im Einsatz gegen das Team Canada.
Aproppo Hockey. Tarf mù iigentlich z Frybùrg momentaan sääge, de Spengler Ggöpp sygi as Grûmpùtùrnier? Epa woou – wäge i ha ja Grûmpùtùrnier gäär.

 

D Spengler-Organisatoore sääge, as sygi «das beste Club-Turnier der Welt» (o we di meischte Klüb versteercht sy oder mit dùm Team Canada a Landesuuswaau debyy isch). Ds Schwizer Feernsee ziigt Stùnn fùr Stùnn fùr ds Wienachtsloch z fûle. Sogaar z Kanada fieberi d Lütt vor ùm Feernsee bim Spengler Ggöpp mit. Frybùùrger pûügere z Hùnderte ùf Dafoos fùr det Hockey mit Ferie ù gueter Stûmig zùr a Winterparty z kombiniere.

Was chenti da dra nit guet syy? Nüüt, deich. Auz typptopp! Gniessets ù häbet Frûûd.

Guet, wär wiis nach ama Maanet no, wöller Mannschafte ùberhoupt debyy gsyy sy? Ù wäär na zweene Maanet, wär itz ggwùne het? Wysoo müesse si graad d Finaau-Byleet biliger gää, dass es det o no vou chùnt? Auz tüppisch fùrn as Grûmpùtùrnier.

I bû gsyy ga graabe, vo wo ds Wort Grûmpùtùrnier chùnt. Scho im 19. Jarhùndert hets regùmäässig Grûmpùschiesse ggää. Das sy so Mini-Schûtzeföscht gsyy, wo mù ùm allerlei chlyyni, zämepättleti, iigentlich wärtloosi Gägestenn oder Gaabe gschosse het. Di chlyyne Pryyse ù ds Gseliga näbedra hii son as Grûmpelschiesse uusgmacht. Meischtens het mù am Sùnntignamitaag gschosse ù am Aabe hets de d Gaabevertiilig mit ama Föschtässe ù Tanz ggää.

D Schûtze denn, d Schütterler speeter ùf de Grûmpùtùrnierplätz ù d Hockeyler itz z Dafoos hii iis gmeinsam: As giit ùm d Frûûd ù ùm d Eer. As isch a Plattform fùr d Top-Spiiler, de bierseelige Zueschauer Spektakù z biete. We mù gwint: super! We mù verliert: tampi haut!

Ù drùm isch es doch iigentlich as Kompliment, we mù i der verbisseni Spitzesport-Wäut no vo Grûmpùtùrnier cha rede. Aber tüet nit asoo, wy wen es ùm epis geengi.

Kommentare zu diesem Artikel