Autor: Christian Schmutz, Oorespitzer
Träge sitzen die vier Männer am Tisch des «Geiers». Michel gähnt.
Patrick: Jaja, Mischù, i wiis. Wienachte isch nüme wy früer.
Hugo: Aba, tùmms Zügg, asch doch ali maau ds Glyycha. Dii mit chlyyne Chinn hii as Wienachtsbüümeli ùn a Zyleta Gscheichlini drùnder…
Franz: …ù dii oni chlyyni Chinn oo.
Michel: Wier nit! Scho lang abgschaffet… Zùm Glück, chan i daa nùme sääge. I wot doch ki Stress z Wienachte.
Franz: Drùm isch der äbe itz so lengwylig. Oni Gscheich wiischù ja i dene Taage nit ùber waas z rede.
Patrick: Aber Voorsätz fùr ds Nüjaar heschù hoffentlich no nit abgschaffet, oder Mischù?
Michel: Potz Wärchtigshemmli, säg, dù meechisch daas no! Voorsätz sy doch epis fùr Vorwärtsparkierer.
Franz: Oder de Möörgeli. Dä nümt sich vilicht voor, sich nüme vo de Sùna la z blende.
Hugo: Jaa dùù! Guete Möörgeli zmoonerischt na geschter.
Patrick: Oder de städtisch Gmiinraat, dä nümt sich voor, endlich 1+1 chene zämezzöle.
Hugo: O nit iifach.
Franz: U de Moritz Löyebärger probiert sich nit in Lùft uufzlööse. De muess ne sy Scheff, de Levrat, nit uuslache.
Patrick: Aber iigentlich heschù rächt, Hügù. O i dem Jaar isch Wienachte soo wy ging.
Hugo: Lisi, ùf daas ay nää wier no as Pastis. Dehiim lùùft sowysoo nùme das uufblaase Grümpùtùrnier.
Michel: Tüe d Chinn schutte?
Hugo: Neei, de Spengler Cup im Feernsee.
