Autor: Christian Schmutz, Oorespitzer
Im Radio des Restaurants «zum Geier» wird verkündet, dass Stéphane Lambiel seinen Rücktritt erklärt hat.
Franz: Nit schlächt. 23-jerig ù scho pensioniert.
Hugo: Dasch itz äbe ds flexibù Rentenauter.
Patrick: Dä het doch kööre sääge, dass d Pensionskasse i de lötschti Wùcha z Abertuusige vo Franke verloore hii.
Hugo: Dù minsch: Itz laat er sich no flingg la pensioniere, bevors z spaat isch mit Chöle ùberchoo?
Patrick: Genaau.
Michel: Ging uufhööre, bevors bärgab giit.
Franz: Potz Wärchtigshemmli. De gits no vüu ander, wo sich flingg setti la pensioniere, bevors no schlümmer chùnt.
Hugo: D Bùndesräät?
Michel: Jaa, emù di aagschlaagne Merz ù Schmid.
Franz: Oder de ganz Raadsport.
Hugo: Neei, nit de ganza, de Cancellara schynts ja niit – oder no niit.
Patrick: Ù Gottéron. Itz graad wee si no obetùm Strich.
Hugo: Oder Westside, bevors ganz zämechrachet.
Franz (leise): Nume de Haider isch z spaat choo mit pensioniere.
Hugo: Ja dùù. 1,8 Promill ù 142 Stùne isch o fùr dä Kämpfer a bitz z vüu gsyy.
Patrick: Lisi, wier nää no as Pastis – aber hüt gglùùbeni oni Aukohou.
Michel: Genaau. Vilicht hets ja no bitz Gäud ùf de Banke, fùr ass es dewärt isch wytterzlääbe – ù sich de speeter amaau la z pensioniere.
