Autor: Urs Haenni, Oorespitzer
Pöilu: «Hätte Tante Trummle statt Trompete, täte d’Tante trummle statt tröte.»
Röbu: «Häh?»
Pöilu: «Dr Whiskymixer mixt de Whisky für de Whiskymixer. Bierbrouer broue bruuns Bier, bruuns Bier broue …»
Röbu: «Bisch gaga, oder was?»
Pöilu: «Halt, no eine: Jedes Jahr jammeret dr Jäger Julius bi dr Jagd, will syni Jägerhose juckt.»
Aschi: «Röbu, I gloube mer müsse em Pöilu ds gälbe Wägeli la choo.»
Rolf: «Guguus, Pöilu, hie si mer. Probiere mers mit em GABI: Gibt er Antwort?»
Pöilu: «Ja, ja, isch scho guet. Alles i Ornig! I ha nume chly müesse üebe.»
Röbu: «Üebe?»
Pöilu: «Eh ja: Zungebrächer üebe! Bi mir im Büro chönne fasch alli dr Name vo däm Vulkan z’Island uswändig. Nume i nid. I chume mir scho chly blöd vor. Achtung: Eyjafjalla … ehh?»
Rolf: «Isch doch eifach: Eyjafjallajökull! Merk dirs eso: Eh ja, Fiala, wie d’Zürcher Politikerin, und Joggeli, wie ds Basler Schuttstadion.»
Aschi: «Als nächschts lehre mer mit dir de no dr Vulkan z’Mexiko: Popocatepetl.»
Pöilu: «Dori, chasch mir es chüels Chübeli cho bringe!»
Röbu: «Plötzlech blybt das däm no, mit sine Zungebrächer. Nei, da lob ig mir üsi Hügle i dr Umgäbig. Mit Aderahubel und Bodemünzi muesch nid grad zu dr Logopädin springe.»
Pöilu: «Uf em Bodemünzi müend si d’Münze am Bode mit Müntschi …»
Aschi: «Hör uf spinne! Muesch üs nid mit Zungebrächer quäle. Es längt scho, wenn i mir mängisch uf d’Zunge bysse.»
Rolf: «Muesch halt uufpasse bym Ässe!»
Aschi: «Nid bym Ässe, aber wenn i ghöre, wie üsi Stadtpolizischte holländische Turiste reihewys Parkbuesse a ihri Oldtimer chlemme. Da het sich gwüss mänge vo ihne uf d’Zunge bysse.»
Pöilu: «Wenn die blöde Polizischte e Blattere blondi Plöischler mit blaue Buesseblätter plage, so blybe die plötzlech dehei, und tüe dert Polle vo de blutte Bluemeblüete blase.»