Franz klopft auf den Tisch: I bü defüür, ass mer üsa Stammtüsch ernüere. De gits endlich amaau eppis Nüüs.
Patrick: Waas Nüüs? Gits no eppis andersch aus Pastis im Lääbe? Lisi, no as Pastis!
Hugo: Wysoo ùberhoupt ernüere? As giit üüs doch guet hie im Geier.
Franz: Itz muess ifach eppis gaa! Gopf: Wienachte, Ooschtere, Muetertaag, Serwela bräätle, Chüubi fryggle ù näy feets ùmmi va voor aa. I ma ifach nüme!
Michel: Isch der bim Sùppa-Choche zùm Muetertaag d Brägùpfana ùf d Zeeja kyyt, oder waas?
Franz: Saasseri!
Patrick: Neei, nit Saasseri, «Sasser» hiisst dä Kompyuuter-Wùùrm, wa si itz de jùng Uurhääber vùrwütscht hii.
Michel: Gseesch, doch eppis Nüüs.
Franz: U wier hii a Verfassig va 1857! Det schiesst mù sicher no mit Pfyle ù Boge. I sääge nùme: ernüere.
Hugo: Hesch rächt, d Pfyle sy out, emù d Süuber-Pfyle. Dù büsch doch aube McLaren-Fään gsyy, Myschù. Was siischù dezue?
Michel: «Sauber.»
Patrick: Aber setti de statt Pfyle ù Boge i de Vùrfassig Stäcke ù Hùne staa wy itz im Irak?
Michel: Neei, eener Mässer ù Bieli wy i de Micarna.
Franz: Jaa dùù, z Tuusige sygi ga ggùgge, wy si metzgge.
Patrick: Un a settigi Verfassig wettischù?
Hugo: Aba, wär redt itz no va de Verfassig. Di chùnt doch sowysoo aagnoo, o oni Waffe. D Waale tüeche mi spanender.
Patrick: U de Fränzù, wär chùnt yy?
Franz: As chùnt drùf aa, ob es sou plyybe oder Nüerige sou gää. De geeben es a Auternatyyva gäge linggs ù iini gäge rächts.
Michel: Aber itz wot sicher gaar niemer würklich i Staatsraat, wyl es det scho a Enderig git: d Rente sinke oder chää gstriche, we si nit lang im Amt plyybe.
Hugo: Dù minsch, as sygi glyych, wär gwääut cheemi. I zwüüne Jaar geeben es de sowysoo früschi Staatsräät.
Michel: Vilicht. Aber in era Abwaau chenti d Kandidaate abhäuffe. As flattere doch schwettenewyys Zedle va «Professoore» i d Hüüser. Di verspräche ali Probleem z lööse ù garantiere zùm Byyspüu Prüefigserfouge. Dasch ja o wyn a Prüefig.
Patrick: Guet, mengisch landet iina va dene Hiiler vor Ggricht, aber: «No risk, no fun!»
Hugo: Asoo teete di Kandidaate eersch no d Würtschaft aakùùrble.
Patrick: Jaa, aber nùme dia z Weschtafrika.
Franz: Hùùptsach, ging eppis Nüüs, gälet.
Christian Schmutz, Oorespitzer