Autor: Urs Haenni, Oorespitzer
Röbu: «Pöilu, hock ab! I gseh ja nüt am Bildschirm. Nid, dass i wäge dir no n’e heissi Szene verpasse.»
Rolf: «Dir mit öiem Schutte. Heissi Szene, dass i nid lache. Bi däm Alibi-Pässle.»
Röbu: «Tue doch nid so. Schutte isch im Fall viel meh als nume Gool und Chance. Das si Emotione, Bewegig, Farb, Kultur.»
Rolf: «Du und Kultur. Das isch ja öppis ganz nöis.»
Röbu: «Gwüss dänk. Sit dr Ball z Südafrika rollt, cha n’i es paar Bröcke Zulu.»
Pöilu: «Zulu? Du?»
Röbu: «Sicher: Vuvuzela, das heisst Tröte. Und Jabulani, das isch dr Ball.»
Aschi: «Also, me lehrt emu ou uf Dütsch öppis nöis bim, Sport. Zum Byspil Flatterball.»
Röbu: «Pöilu uf d Site! Achtung, dr Ball chunnt i Strafruum, schiess doch, neiii, wieder so n’e Hallelujahpass.»
Aschi: «Hallelujahpass? Da hei sogar d’Pfärrer öppis vom Schutte.»
Rolf: «Mir no n’es Herrgöttli!»
Pöilu: «Es Herrgöttli? Da muesch uufpasse. Gmäss nöier Sprachregelig vo de Bärner Beamte isch das nid gschlächtsneutral und ghört sanktioniert. Me sött wahrschynlech Himmelspersonal säge.»
Röbu: «Hör doch uf mit däm Brunz! Zebrastreife statt Fuessgängerstreife, und denn no dr Gipfel: das Elter statt dr Vater oder d’Muetter.»
Pöilu: «Zumindest Pousezimmer statt Lehrerzimmer isch guet. Das chunnt dr Realität öppis nächer.»
Rolf: «So, wird nid fräch! Aber das mit dr Sprachregelig isch scho chly heikel. Z Murte het dr Gemeindrat derwäge e Krisesitzig yberuefe.»
Aschi: «E Krisesitzig?»
Rolf: «Eh, all hei Angst um ihres Ämtli. D Chrige Fäldmaa, d Käthi Thalmaa und d Ursula Schneider – alles Näme wo nid gschlächtsneutral si.»
Pöilu: «Jitz, wo d’s seisch: Dr Generalrat isch voll vo so froueverachtende Näme: Dr Steffu Guetknächt, dr Dänu Fürst, dr Alain Grandjean, der Hans Jürg Herren und dr Fritz Wüethrich. Da würds mir als Frou im Generalrat ou Angscht und Bang.»
Rolf: «Ds Eländ geit über Murtner Gränze use: Z Muntelier regiert dr Ekmaa, und als Préfet hei mir dr Lehmaa.»
Pöilu: «Und dr Abfall holt i dr ganze Region dr Haldimaa. Wenn das nüm erloubt isch, denn sitze mir schön im Dräck.»
