Autor: christian Schmutz, oorespitzer
Patrick Dasch a Sach mit dùm 1. Meie diss Jaar!
Hugo Wysoo de? Büschù ùnder di lingge Demonschtrante ggraate?
Franz Oder ùnder d Meiesinger?
Michel Oder mitz i d Uffarts-Prozessioon?
Franz Oder epa im Tour de Romandie-Wölo-Stou gsteckt?
Patrick Ebe ggùget. Itz wüsset er scho, was i gmint ha mit dem koomische 1. Meie. Ma chenti miine, ds Jaar 2008 geengi hüt fertig ù drùm müessi no 100 Sache drachoo.
Michel Ds Meiesinge sygi ja ùf e 2. Meie verschobe.
Patrick Aba! Bi mier i de Stadt sy re emù hüt scho cho singe.
Hugo Sicher miserabù! Si chii emù nüme wy wier früer.
Patrick Nüüt daa! «Aux Champs-Elysées» drüüstümig! Nit schlächt … Guet, as sy nùme zwee Sänger gsyy, aber glyych.
Franz I hoffe, bi dene vüle Sache vermüschlet niemer epis.
Hugo Dù minsch as geengi iina mit dùm Rennwölo a d Prozessioon?
Michel Oder dass d Lütt ds Gäud de Wölofaarer fùr Doping gäbe statt de Chinn?
Patrick Oder no besser, dass d Chinn fùrn a Mündeschtloon bim Meiesinge afee demonschtriere.
Michel Das wee amaau epis ganz Nüüs.
Hugo Lisi, i nüme daa lieber no as Pastis.
Franz Aber mach de, dass dù no Gäud hesch, we si bi dier chää cho Meiesinge.
Hugo I bruuche kis Gäud: Früer hiigi si as Ei ggää, näy epa as Bätzi ù hüt nää si am liebschte di anderi Wäärig.
Franz Euro?
Hugo Neei, Panini.