«Lueget mal die Soldate am änere Tisch. Chuum abghockt, öppis trunke, gönge si scho wieder. Bi üs isch das no anders gsy. Da si mir am Morge i ds Café und si gwüss bis zum Mittagässe blibe.» «Die überchöme wahrschynlich scho kei Sold me. Dr Bundesrat Merz het doch dene das rübis und stübis gstriche. So längt halt ou ds Gäld nümme für no n’es zwöits Chübeli.» «Apropos Militär: Pöilu, settisch du nid im WK sy? I ha gmeint, me gsechi di zwöi Wuche lang nümme.» «I ha’s ou gmeint. Aber sie hei mir nie es Uufgebot gschickt, und wo n’i em Bundesamt telefoniert ha, hets gheisse, si wüsse ou nüt und chönne mir leider nid wyterhälfe. Wo n’i nächti no dr Sektionschef Chrattinger gfragt ha, so het er nume mit de Schultere zuckt und öppis vo i Bart ine brümmelet.» «Das ligt schyns a dem nöie System . Es weiss offebar die linggi Hand nümme, was die rächti macht, und umgekehrt. Die hette doch die 1,2 Millione Franke für d Armee-21-Fyr gschyder i das Pisa investiert.» «Pisa? Mit däm hei doch scho üsi Schüeler Müeh gha.» «Nume hei d’Schüeler bim Läse schlächt abgschnitte, und ds Militär halt jitz bim Rächne.» «Dori, mir no n’es Chübeli. My Lohn het dr Merz Gottseidank no nid gstriche.» «Also, wenn das d’Armee 21 söll sy, das me kei Soldate me i de Beize gshet, so weiss i ou nid, was mir dennzumal abgstumme hei.» «I de Beize wird’s ou immer kurliger. D’Soldate verschwinde langsam, derfür bsetze i de scho d’Wyber dr Stammtisch. Mir müesse grüselig uufpasse, dass sie üs nid ou no üse Stammtisch under em Bierdeckel furtschrysse.» «Das mit dem Frouestreiktag het mi ou grad rot gmacht vor Wuet. So stöh si am Morge früech vor em Bahnhof, nähr gseht me si de ganz Tag nümme, wil sie im Café hocke, und am Abe zeige sie sich no einisch mit rote Fahne und Ballön uf dr Strass. Aber nume grad so lang, dass sie no hei chönne ga dr luege.» «Also, wo mini Frou am Mäntig i mene rote Pulli hei cho isch und keis Znacht uf em Tisch gstande isch, so ha n’i ihre grad die roti Charte zeigt.» «Eh, so näme mir doch zur Abwächslig no grad vier Ballon Rote.»
