Mmh, de Ggaffi tuet myne Näärve guet. I ha scho deicht, i chöni mier hüt nüme beruige.
Me, was isch de o passiert, wa di aso tùriiset het. Umi amaau de Housi oder waas? Ja, stöù der vor, my Maa het doch hütamorge tatsächlich aso ganz näbebyy gfragt, was i igentlich de ganz Tag machi, wen är geengi ga wärche. A son a Frächhiit. Het de dä ds Gfüül, dù sitzisch nùme vor ùm Fernsee, tüegisch Ggaffi triiche ù stùnelang plöuderle oder waas? Ma chentis mine. Debyy macht sich de Hushaut o nid grad van aliinig. I wetti dää amaau gsee, a settiga Huuffe Wäsch z mache, ds Huus ging piccobello z haute und ging no au Tage eppis guets ùf e Tüsch z bringe. Tüpisch Mane! Di müesse haut de Erfoug ging exakt chöne mässe, entweder i Gäud, i Goou oder i Goofe. Aber äbe, si chi iigentlich nüd defür. Das ligt i ines Geen. Was söu daas itz ùmmi hiisse? Isch d Natur tschùud oder waas? Neei, aber das chùnt va früner i de Evolution, wa d Mane no Jääger gsyy syn ù nùme hii chöne überlääbe, we si erfougryych Naarung erliit hii. Debyy würden i ja o gäär ùmmi a bitz ga wärche. Aber är wott das gaar nid. Syni Frou hiigis nid nöötig, hett är ging gsiit. U das laaschù dier la gfale! Scho asmaau eppis va Emanzipation ghöört?! Aba, höör mer doch uuf! Glyychberächtigùng zwüsche Mane ù Froue isch gaar nid müglich. Das si zwoo verschidini Spezie, wo nùme ganz zuefälig ùf um glyyche Planeet lääbe. Solang dass d Mane a ki Chinn chü bechoo, gits a ki Enderig!Zùm Glück chü si nid gebääre! I gglùùbe, de wee d Menschhiit scho lang uusgstorbe. Wen ii deiche, wy weelydig wa my Fùnsi isch. We dää as Bobooli hett, de erwaartet er, dass sich graad di ganzi Wäut drùm kümmeret. Ja, das kenen i o. Aber as pigget mi glyych, dass myni Aarbiit im Hushaut nid mee anerkent isch. Wiischù waas? Laa doch de Hushaut amaau a paar Tage la syy – maau ggùgge, ob ers meerkt. Das fünen i a gueti Idee: putz nüme, wäsch nüme, choch nüme – a son a Aart chlyyna Streik!Minschù, das bringi eppis? Ja, klaar. De hettischù ersch no endlich amaau Zyt, taagsdüür Fernsee z ggùgge. I sääge Dier: was mù ùs dene Talkshows ù Serie aus für ds Lääbe cha leere! Da drùff müesse mer aastoosse: Fröläin, no drü Ggaffi crème. U bringet nes graad no drü Stück Schwarzwäuder.
