Pöilu: «Manne, I gratuliere ganz härzlech zu eurer hoche Uuszeichnig. Dir heit sie würklech verdient!»Aschi: «Uuszeichnig? Hei mir öppe de Möffechäs überchoo?»Röbu: «I weiss ou vo nüd. Meh als d’Süffle vom Jahr cha’s ja nid sy.»Pöilu: «Heit dir’s nid ghört oder gläse? Mir alli, jede einzelne vo üs, isch zur Person vom Jahr 2006 gwählt worde. I weiss zwar nid warum, aber äneme gschänkte Ross luegt me nid I ds Muul.»Rolf: «Ja, jitz hei mer dä Reige vo so komische Title wieder hinter üs. I bi ou nid ging druus cho. Zum Byspiel, warum dass jitz ?Rouchverbot? ds Wort vom Jahr sell sy.»Aschi: «Oder dass e Verteidiger, und ersch no n’e Italiäner, Fuessballer vom Jahr worde isch. Dr Federer isch Sportler vom Jahr, dr Köbi Trainer vom Jahr. Und für mi isch ds Dori Servierdüse vom Jahr.»Pöilu: «Z’mingscht cha me säge, dass es gwüss nid ds Jahr vo de Diktatore gsy isch. Z’erscht isch de Milosevic gstorbe, nähär dr Pinochet, und zum Schluss no dr Turkmenbaschi und dr Saddam obedruf.»Aschi: «Dr Fidel Castro macht wahrschynlech ou nüm lang, und sogar dr Berlusconi isch vor churzem umkippet.»Rolf: «Da macht dr Couchepin no dr bescht Ydruck vo all däne.»Röbu: «Eigentlech sött me ja dr Diktator vom Jahr küre. Das het, so viel I weiss, no niemer gmacht.»Pöilu: «Also I wär für de Turkmenbaschi. Dä het am meischte Fantasie. Mit sinere Statue, wo sich nach dr Sunne richtet; sim Buech, wo bi dr Fahrprüefig teschtet wird; oder em Wuchetag, wo nach sinere Muetter benannt isch.»Röbu: «I bi für de Walter Zürcher, z Merlach. Dä laht sich uf Läbzyte zum Syndic la wähle.»Aschi: «Oder mi Chef, wo so tuet, als sig är diräkt vo Gott ygschtellt worde.»Röbu: «Mini Alti, wo meint, I chönnt e chly meh Zyt deheime verbringe…»Pöilu: «Mi gröscht Diktator isch mini Agenda. Die seit mir nämlich jitz scho für e ganz Jänner, was I wenn z tüe ha.»
urs haenni, ohrespitzer
