Rosemarie, no vier Balong Wyyssa, bitte. Potz Wärc

Rosemarie, no vier Balong Wyyssa, bitte. Potz Wärchtighemli, hiit ier di Brügg gsee, wa si z Frankryych puut hii. As wäutz Tütschi. Ù nùme drüü Jaar hi si bruucht fer sa z bue. Momou – «Chapeau» cha mù da nùme sääge.Ù wyer mache as wäutz Gschyyss fer üses häärziga Poyabrüggli. Vier Mau chüürzer ù drüü mau weniger hooi: Das hiist, d Poyabrügg isch imena haube Jaar fertig gstöut. Rosemarie, chasch de Schämpis scho ga chaut stöle. Verlecht müessti bi üüs oo a «Sir» di Sach i d Hann nää. Brügge bue chöö wyer z Frybùrg doch am böschte säuber, n’est-ce pas? Ù sowysoo: Ma muess doch nid ging miine, d Ùsländer chöni autz besser. Das siit grad de Jùschta. Wär fröit sech, dass si z Amerikaa ääne nid Hockey spiile ù ali di Cracks bi üüs iines Gäud verdyene, he?Ja, ja. I dem Fau wot mù d Ùsländer ùm z verrecke nid la gaa, zaut iine guets Gäud ù i anderne Fäu schückt mù si sofort ùmi hiim. Wenn möglich no ganzi Famylene mit chliine Chinn.Wenn es ùm üsers Vergnüege giit, de isch das äbe öppis andersch. Debyy näme di Spiiler ja iigetlich oo Aarbiitsplätz awägg. Ù Gottéron cha i dem Gschäft nid Schritt haute. Das tuet äbe scho di ganzi Miischterschaft verfäutsche. «Copains» müessti si äbe syy, so wy früer. Gùgg doch ùf Thun. Di sy im Schutte o mit weenig Gäud voor debyy. Deföör schuttet Basù mit ema groosse Budget nùme Seych zäme. A huuffe Gäud haa isch äbe a Garantyy fer gar nüt. Gùgg asmau ùf Paris. Was dä Hirschdings da aarichtet, giit ùf a ki Chuehut. Settigs hii wyer i de Gginggelischuu aube oo gmacht. Das isch äbe Kùnst, nid waar.Das Gstöörm fer iina, wo derglyyche tuet, de Blocher aa zbisle… A soo öpis tuet emù nid wee. Vor allem hii di stouze Ständerät z Bärn fa iines Sässle uus a Straaf beschlosse. Jùschti Mymöseleni si daas. Trötzele sägen ii dem. De de Buman isch sich wenigschtens säuber as Böud ga mache fa de Uusstellig. Är hät sich öppa nid gstoosse drann. A kis Wùnder isch das fer de de Buman nüt Speziöus. De Blocher aabisle isch oo nùme a Million wärt. As Loch i de Pensyonskassa va de Gmiin Frybùrg hinderlaa 100 Millione.