Autor: Urs Haenni, Oorespitzer
Pöilu: «Autsch!» Röbu: «Tschuldigung, ha nume miner Füess under em Tisch e chly müesse usstrecke.»
Pöilu: «Füess usstrecke isch guet: E rächte Gingg ha n’i a ds Schienbei verwütscht. Und ersch no mit dine herte Stifle. Das tuet weh!»
Röbu: «Sorry, ha n’i gseit. Isch ja nid mit Absicht passiert.»
Rolf: «Nid mit Absicht? Bi öich Buure weiss me nie. Wo d Bundesrätin Leuthard letschti im Jura uufträte isch, heit dir Buure emu ou mit Absicht Stifle nach ihre gschosse. Es Wunder, dass sie derby nid troffe worde isch.»
Aschi: «Wo hei ächt die das abglueget?»
Pöilu: «Wo ächt? Es isch gwüss kei Zuefall, dass die Stifel-Wurf-Aktion im Jura churz druuf passiert, nachdäm dr Schuehwärfer von Bagdad z’Gänf het dörfe yreise, und a so neme Seminar erklärt, wie n’är mit sim Schueh fasch dr Bush troffe hett.»
Röbu: «Dori, mir no n’es Chübeli!»
Rolf: «Es isch scho luschtig, wie plötzlech e Stifel üses politische Gescheh dominiert.»
Aschi: «Jäh meinsch dr Stinkstifel us Tripolis?»
Rolf: «I ha ehner a Stifel a üsere Südgränze dänkt.»
Aschi: «Ah, du meinsch Italie?»
Rolf: «Äbe ja. Zersch fange sie dermit aa, jede z’filme, wo über die schwizerisch-italiänisch Gränze fahrt, und nähär no die Razzia i all däne Schwizer Bankfiliale.»
Aschi: «Auso, irgend öppis muess dr Berlusconi ja mache, dermit nid alli ihres Gäld am Fiskus verbyschmuggle. Wie chönnt är sich süsch Pool-Parties mit sine blonde Minischterinne leischte?»
Pöilu: «I verstah doch die. Würdsch du öppe dis Gäld enere italiänische Bank aavertroue?»
Aschi: «Gwüss nid. I ha mi Sparbatze guet versteckt. Im Stifel under em Bett.»
