Autor: Christian Schmutz, Oorespitzer
Patrick: Härggott, hüt am Moorge han i auso as wäuts Schwein ghääbe – ù ier ali oo.
Michel: Wysoo? Epa wyl im Bùndesraat ùmmi amaau «Zickenkrieg» sygi. Da hete mer ja diräkt chene dezwüsche graate!
Patrick: Tùmms Züüg. Deich, Schwein ghääbe, dass mer nit im Schwarze Loch verschwùnde sy.
Franz: Jaa, dùù. I de Mùùrtegass het es sich ùf ds Maau uuftaa. As wäuts Loch! Würklich Schwein, dass i nit graad det i ds Loch ay bü.
Patrick: Neei, deich ds ächt Schwarz Loch. Daas, wo si itz z Genf ùne graad paschtle. Das hetti liid chene i d Hose gaa.
Hugo: Jaa, bi dier schoo. Da isch awägg o scho lengschtens as schwarzes Loch i de Hose, gau Pädù. Hahahaha!
Michel: Fertig gstüürmt. Nää mer no flingg as Pastis. Ma wiis nie, wenn ass es z lötschta isch, gälet.
Franz: Lisi, no as Pastis.
Hugo: Aber was mi no vüu mee uufregt, sy di blööde Gschüchte ùber d Patty Boser. I ha diräkt Angscht, dass si no mee i de Zytùnge ùmgschlüüpft chùnt.
Michel: De Gölä man i o scho lang nüme gsee …
Hugo: … jaa – ù d Michelle Hùnziker o nit.
Patrick: Niit? U näy siischù mier, Hügù, i hiigi as schwarzes Loch i de Hose. Epa dùù, we dù d Michelle ù d Patty nit masch gsee!
Michel: Potz Wärchtigshemmli. Wenn i ööch zuelose, de hettet er vilicht au zäme gäär as chlyyses schwarzes Loch dehiim – iis, wo gezielt ali Äärgernis ùs de Wäut schaffet.
Patrick: Da säägen ii nit neei – ù de Hügù, da Ploderihùnn, teeteni det o graad versoorge.