Autor: Urs Haenni, Oorespitzer
Röbu: «Läck Bobby, Pöilu: So ne grossi Ychoufstäsche voll mit Päckli. I gloube, ds Christchindli muess das Jahr bi öich dihei Überstunde mache.»
Pöilu: «Uf all Fäll ha n’i alles zäme. Und es wird niemer Grund ha, sich z’beklage. Obwohl, dir wüsset ja, d’Chind wärde ou jedes Jahr aaspruchsvoller. Aber die glänzende Äugli, wenn sie d’Päckli under em gschmückte Wiehnachtsboum gseh…»
Rolf: «Bi üs funktioniert das sit churzem nümme.»
Pöilu: «Werum nid? Diner Chind si emu no nid so alt, i ha gmeint, ds Christchind sig bi ine no hoch im Kurs.»
Rolf: «Fertig Christchind! Sit es paar Wuche isch die ganzi Illusion kaputt.»
Röbu: «Het öpper us dr Schuel zviel über ds Christchind usplapperet?»
Rolf: «Nei, nid d Schuelkollege. Wikileaks!»
Aschi: «Dori, mir no n’es Chübeli.»
Pöilu: «Ja, das Wikileaks het vieles kaputt gmacht. Es isch zwar nüd usecho, wo me nid scho gwüsst het. Aber Wikileaks het enthüllt, was me bis jitz eifach dert verzellt het, wo dr richtig Rahme derfür gsy isch.»
Rolf: «Het vo öich scho öpper Sache bi Wikileaks nachegluegt?»
Aschi: «Werum? Das betrifft doch nume die hochi Politik und Diplomatie?»
Rolf: «Ou nei. Da findsch zum Byspiel Akte vom Oberamt und Gmeindratsprotokoll vo Gurmels bis Muntelier.»
Röbu: «Das isch nid wahr?»
Rolf: «Scho sicher. Bi Dokumänt us em Oberamt ha n’i zum Byspiel erfahre, das me dir ds Permis einisch wäggnoh het, wo du z’viel Promill gha hesch. Oder vo dir, Pöilu, cha me läse, dass du diner Wiehnachts-Gratifikatione i dr Stürerklärig nid aagäh hesch.»
Pöilu: «Frächheit!»
Rolf: «Aber ou us gheime Gmeindratssitzige erfahrt me allerhand. Öppe dass d’Stadtpresidänti gar nid Fröid het, wenn dr Stadtschriber Höchner bi jedem Apéro-Büffet eso zuegryft. Oder die gheimi Liste, wo dass Murte überall uf ds Gäld vo de ryche Nachbergmeinde schilet: bi de Schuelhüser, de Industrielle Betriebe, Ghüder, Parkbuesse, Wägzöll, Füürwehrusrüschtig, Fischereirächt und so wyter.»
Aschi: «Für das bruchts doch kei Wikileaks. Da derfür hei mir ja d Fasnachtszytige.»
