Autor: URs Haenni, Oorespitzer
Pöilu: «Röbu, dis Hemd isch ja ganz voll Fläcke, und es schmöckt nach Bier u Schnapps. Säg nume, du bisch ou am Botellón gsy.»
Röbu: «Was ächt! D’Hockeysaison faht ja ersch nächscht Wuchenänd aa, und denn het Gottéron ou no z’ersch es Uswärtsspiel.»
Pöilu: «Hesch eigentlech Schmalz i de n’Oore? Botellón ha n’i gseit, und nid Gottéron!»
Röbu: «Bote … wie?»
Pöilu: «Du bisch ou vo geschter. Dänk Botellón, das Massebesüfnis vo üsne Junge i allne grössere Städt.»
Röbu: «No nie ghört. Was isch ou das für n’es Wort?»
Rolf: «Das chunnt us em Spanische und bedütet grossi Fläsche.»
Röbu: «So säget’s doch uf Dütsch. Also, wenn dr Streller e Penalty verschiesst, oder dr Sämi Schmid wieder siner Huusufgabe bim Armeechef nid macht, so blybe das für mi Riesefläsche, und nid Bote … wie scho wieder?»
Aschi: «I gloube, du lersch es nie. Dori, mir no n’es Chübellón!»
Pöilu: «Apropos lere. Müesse mir jitz nid scho bald über d’Schuel ga abstimme? Me ghört immer vo däm Harmos. Was isch das eigentlech?»
Röbu: «Das het dänk mit Harmonie z’tue. Irgend so n’e Massnahm, dass d’Chind besser mitenand uuschömme, und d’Lehrer weniger Stress hei. I gloub, es geit da drum, dass me ab dr vierte Klass d’Schüeler nöi düremischt, nid dass es öpperem no z’wohl wird im Schuelzimmer.»
Aschi: «Sit dir sicher? Het das nid mit dr Pisa-Studie z’tue, so dass d’Schwyzer gsamteuropäisch wieder besser klassiert si.»
Rolf: «Quatsch! Es geit doch um freii Schuelwahl.»
Röbu: «Aha. Das macht Sinn. So chönne die Schüeler, wo vo ihrne alte Gspännli trennt wärde, grad a ‘ne nöii Schuel, und dert wieder näbenand sitze.»
