«Dori, no n’es Chübeli für mi, und für miner Suufk

«Dori, no n’es Chübeli für mi, und für miner Suufkumpane ou no grad e Rundi.» «Potz Sunntigshemmli, de Röbu het em Aaschyn na hüt d’Spändierhose a. Hesch im Lotto gwunne?» «Schön wär’s. Nei, i ha dänk am Zyschtig mi Sächzigscht gfyyret, und da darf i öich gwüss ou no eis ussgäh. Füüf Jährli no, denn zügle ds Änni und ig i ds Stöckli und dr Jung übernimmt dr Hof.»«I ds Stöckli? I ha dänkt, mir hei scho gnue Ständerät. Und überhoupt: Du würsch viel besser diräkt i Bundesrat passe.» «S’Alter derfür het dr Röbu zmingscht.»«Mit Sächzgi? Gwüss nid. Da bruuchts jungi und dynamischi Lüt.»«Aba. Lue doch, wär sich jitz für em Villiger si Sitz bewirbt: Dr Steinegger Sächzgi, dr Merz Einesächzgi und dr Blocher gar Drüüesächzgi…» «Dr Couchepin wird ou nüm jünger, und so schnäll wie d’ Metzler ha n’i no nie öpper gseh altere.» «Wenigstens isch das e Bytrag zur Entlaschtig vo üsne Altersheim.» «Es si emu gueti Lüt. Wenn dr Blocher im Bundesrat blocheret und dr Steinegger no si Urner Gring derzue bringt, so
muess üse Deiss e warmi Chappe aalegge.» «Für mi zelt nume de Steinegger. Dä het üsi Expo grettet und derfür glueget, dass Murte jitz nid no Millione vo Franke inebuttere muess.» «Dr Steinegger? Da chasch ja grad de Erich vo Dänike hole. Dä het sy Mistery-Park ohni Subväntione bout, und er het ersch no Visione. Stellet öich vor: Mit em vo Dänike als Usseminischter würd üsi Schwyz offener, als sich das je öpper vorgstellt hetti.» «Dr vo Dänike isch wahrschynlich ou dr Einzig, wo üs cha erkläre, werum i aller Wält Bärn sich e Regierigsratsbunker het la boue.» «Mi nimmt nume Wunder, wo ächt d’Fryburger Staatsrät ihre Bunker hei.» «Dä Bunker het ihne dr Urs Schwaller vor sym Rücktritt no schnäll bout. I däm riesige Finanzloch vom Kanton het gwüss die ganz Fryburger Regierig bequem Platz. S muess nume no zuedeckt werde.»