«Gopfverdeckel, huere Siech, nondeblöö! Die verdammti Moorerei mit em Äschebächer. Chönnet dir nid uufpasse?»
«Dori, was isch denn i di gfahre? Üs so ga aasinge! Macht dir d’Hitz z’schaffe?» «S’geit nid nume em Dori eso. Dr ganz Monet lang gäng die Brüeti – d’Lüt wärde langsam rumpelsurig. Z’Yverdon eine es Mässer im Ranze, im Bärnische d’Camping-Gäscht vermöblet, und dert hinger Fryburg eine abegstoche, will är em andere si Fründin agluegt het. Das alles cha doch kei Zuefall sy!» «S’isch äuä ou im Mischtelach z’heiss. Z’ersch stimme si gäge d’Fusion, und drufabe gheit, päng, dr Syndic eifach dr Bättel ane. Derby wär’s doch s’Logischte uf dr Wält, wenn die beide Vully fusioniert hätte.»
«Isch doch wahr: Sugiez het zum Byspil e so n’e schöne Schuttplatz…» «Was bringt das? Bärn bout ou es schöns nöis Schuttstadion. Und bevor’s fertig isch, wird ine no dr Cupfinal und die guete EM-Spiel furtgnoo.» «Sugiez het e nöii Poscht…»
«Nachdäm dr Syndic Aebi sich einisch bim Gmeindeverband so für Poschtschliessige ygsetzt het und drufabe prompt die vo Môtier ygange isch.»
«Uf all Fäll selle sich d’Obermischtelacher jitz nid d’Luune la verdärbe, sondern die schöni Uussicht uf e See gniesse, und zwüsche zwöne Ballon Vully uf die vom Untermischtelach abebrünzle.» «Dori, mir no n’es Chübeli!» «Gopfverdeckel, huere Siech, nondeblöö! De verdammti Stress!»
