Hugo: Myschù, was heschù gmacht am Eerschtag-Uùgschte?
Michel: Puuuuh, lengwylig ùma ghocket. Stöu der voor: ii, Michel Meier, amaau am Nazyonaau-Fyrtig oni Füürwärch. Wär hetti daas teicht?
Hugo: Aber hesch eppa woou kauterwyys as Rakeetli zwüü la gaa, oder?
Michel: Sicher nit! We de Staatsraat siit: «Neei!», de isch neei!
Franz beginnt zu schluchzen: Aber i bü doch egschtra ds ganz Jaar lieba gsyy, sniff, fùr ass i iinisch im Jaar jùscht cha bübele ù pfäfzgere.
Patrick: Aber Fränzù! Schüsch büschù emù nit son as weelydigs Tüpfi.
Hugo: Jaa, wa d Puure üsùm Bùndesraat a Brügiwaage vou Müscht vor d Tüür gcharet hii, heschù o glachet ù gchlatschet.
Michel: Das fünen ii itz aber gaar nit schöön. Stölet nùch voor, we daas ööch passiert wee: Dù chùsch hiim, büsch düri ù wosch nüüt andersch aus so flingg wy müglich i ds Hùùli …
Hugo: … ù stattdesse heschù ùf ds Maau a Bäärg «stinkende Tatsachen» vor ùm Huus. Jaa, nit graad gglùschtig.
Franz: Das sygi wäge syr Müscht-Politik, hii d Puure gsiit.
Patrick: Aber rächt hii si schoo. Was sich di Bùndesräät aus uusdeiche. Das git ùnder ki Chuehutt. Si rede Müscht ù bue Müscht ù sy awä no fuu wy Müscht.
Michel: Loss ne politisiere. Wyn a Groossa!
Franz: Jajaa, si isch schöön, dyni Aaspraach zùm Nationaau-Fyrtig. Aber wiisch: Uusrüeffe cha jeda. Machs zeersch besser.
Patrick: Potz Wärchtigshemmli. Was dii chii, chenten ii scho lang. Un a Aaspraach haa eersch rächt!
Hugo: Dù geengisch gschiider amaau an a Gmiinsversammlig, statt daa Pastis z süürggele ù näy törffe ds Gfrääs uufzschryysse.
Michel: Dasch ds Stichwort … Lisi, no as Pastis.
Franz: Aber itz wii mer doch graad ggùgge, wäär d National-Hymne cha singe.
Alle gemeinsam: Trittst im Morgenrot lalaaa, seh ich dich lalalalaaa. Laalalalalaaa laalaa – laalalalalaa laalaalalalaaa laaa …
Hugo: Itz gää mer nis d Hann, lege no as roots Schwyzer Lyybli aa ù näy gaa mer scho fasch dedüür ùs Schwyzer Schutt-Natzi.
Franz: Dä Sprùch isch sicher nit ùf dym Müscht gwachse.
Hugo: Neei, aber ùf ùm Deiss sym – dem vor de Tüür.
Christian Schmutz,
Oorespitzer
