Patrick: Dùù, hiit ersch o scho gglääse?Hugo:Waas ächt? Dass es nüüt isch mit Einheit bi de Chrankekasse?Michel:Oder dass de Köbi de Vogù abgschosse het ù de Blick im Köbi itz wot «Stiel» byybringe?Franz:Oder dass Chlyy-Frybùrg zù Groos-Frybùrg wot wachse – mit 50000 Lütt?Patrick:Neei. Im Tagi-Magi hii si ùber e Stammtüsch gschrübe.Hugo:Stammtüsch? Üsa Stammtüsch?Patrick:Neei, augemiin ùber ds Fenomeen «Stammtüsch».Michel:Was gits daa scho z schryybe, da gits nùme z suuffe, oder?Franz:Lisi, no as Pastis.Hugo:Oder tùmm z lafere, gau Mischù. Fùr dii, wa dehiim nüüt z sääge hii.Patrick:Jaa, de Stammtüsch sygi scho chli Familie-Ersatz, wyl mù nit gäär aliinig sys Pierli triichi. Aber iigentlich sygen er am Uusstäärbe. D Lütt geengi hüt lieber in a Baar.Michel:Oder si wärche vo früü bys spaat, bys si toot ùmkye.Hugo:Si hii ki Zyt mee fùr iines Kùmple.Franz (trotzig): Potz Wärchtigshemmli! Das wee mer no!Patrick:De Stammtüsch gäuti zwaar ùs Symboou fùr Miinigsfryyhiit ù Demokratie, aber är sygi hüt nùme no «politischi Mythologie». As sygi rein a soziaala Oort – wy d Kassa vam Migro oder de Zmoorgetüsch dehiim.Hugo:Auso i bü emu no nie i de Migro a de Kassa gstane.Franz:Da hii si deich o eener d Froue gmint.Patrick:Jaa, wäge as het o ghiisse, de Stammtüsch sygi a ächti Manedomääne.Michel:Das stümt emù niit. Mit dùm Lisi rede mer emù oo, oder?Hugo (resignierend): Ja nù, de stäärbe mer haut uus.Patrick:Wy d Dinosaurier.Michel:Aber de schrybt d Frybùrgera o nüme ùber üsa Stammtüsch.Hugo:De müesse si de iina erfüne. Dene Schùrnalischte isch aus zueztroue.Franz:Mischù, dù hesch ja säuber gsiit, ùber e Stammtüsch gits nüüt z schryybe, sondern det gits nùme a wee z süürggele.Patrick:Oder z sprüüchere.Franz:De stoose mer doch aan ùf üsi mythologischi Rùndi.Michel:U ùf d Dinosaurier.
Christian Schmutz, Oorespitzer
