«Pöilu, Pöilu. Du machsch mir grad Angscht. So bleich, wie
d’bisch. Säg: Isch dr nid guet?» «Bin i bleich? He ja, es ma scho sy. Ömu tschudderet het’s mi grüüslig, wo n’i vori grad s’Polizeifoto vom Michael Jackson gseh ha. Me chönnt meine, es Gschpängscht lueg eim a.» «I ha ou zwöi mal müesse luege. Söttig Foto gseeht me i dr Zytig süsch nume, wenn sie nid identifizierte Lyche abbilde.» «Ja, dem Siech geits leid. Öb er ächt tatsächlich i d’Chischte chunnt? Z’mingscht wird er uf all Fäll no mal tief i ds Portmonnee müesse gryfe. Z’Amerika chöme ja die Ryche vor Gricht meischtens besser dervo.» «Ja, aber nume die Wysse.» «Ja wird ächt dr Michael Jackson jitz als Schwarze oder als Wysse verurteilt?» «Wüsst dir ou, vo welere Schuttmannschaft dr Michael Jackson Fän isch?» «Kei Ahnig.» «Dänk vo de Young Boys.»
«Dori, no n’es Chübeli.»
«Die Jüngschte si
d’Tschütteler vo YB zwar nüm, dr Chapuisat dänkt ja ou scho as Höre und a sy Alterssitz z’Muntelier ir Dorfmatt. Und dr Jüngscht, wo sie gha hei, dr Johan Volanthe, hei sie ja nach Holland müesse la zieh.» «Dä jung Schnuderi, wo zersch meint, är sig z’nobel für uf ds Bänkli z’hocke, und nächär grosschotzig meint, er spiel eh lieber für Kolumbie.» «Uusgrächnet Kolumbie. Villecht sötte ne die alte YB-Kollege no einisch a de Escobar erinnere. Dä het ja ou einisch bi YB gschuttet, und wo n’er für Kolumbie es Eigegool gschosse het, so hei sie ne deheime grad erschosse.» «Möcht nume wüsse, wär däm Volanthe-Schnuderi so Flouse i Chopf setzt?»
