Pöilu: «Sorry, Manne, fasch hett es mir nümme glängt. Findsch ja kei Parkplatz meh, wenn all ihri letschte Wiehnachts-Ychöif mache. Jitz han’i halt grad näbe de Parkfälder müesse parkiere. Aber um die Zyt wird wohl niemer meh cho kontrolliere.»
Röbu: «Tüüsch di nid. Du weisch ja, wie das isch mit de Tschugger vor de Wiehnachte. Da müesse sie ihres Jahressoll no erreiche, süsch git’s nid meh Lohne nächschts Jahr.»
Aschi: «Söll däne nid besser gah als üs. Die 0,8 Prozänt meh Lohn länge ja nid mal für d’Tüürig z’kompensiere. Und d’Chrankekasse isch bi mir 20 Prozänt ufe. Also miner Ferie z’Zermatt han i scho gschtriche.»
Röbu: «Vo Ferie hei mir Buure ja scho gar nie chönne tröime. Aber dass dr Villiger jitz no mit dr Outobahn-Vigniette ufe wett, das isch scho happig.»
Aschi: «Wenn du so gross plapperisch, chönnsch nid i d’Ferie, denn bruuchsch ja ou kei Outobahn-Viniette. Mit em Traktor darfsch ja dert sowieso nid druuf.»
Röbu: «Nid nume das: Dr Moscht söll ou tüürer wärde…»
Aschi: «Du hesch ja dr Diesel für dy Traktor subventioniert. Also, was söll dys Gjammer?»
Röbu: «Aber ds Bier wett är sogar vertüüre…»
Aschi: «Das isch tatsächlech es Argumänt.
Dori, üs allne no n’es Chübeli, bevors meh choschtet.»
Pöilu: «Uf all Fäll zeigt dr Villiger zum Schluss no einisch, dass är sehr wohl gwüsst het, wie spare. Weiss nid, öb dr Merz und dr Blocher das ou härebringe.»
Rolf: «Was redet dir vo spare. 1,2 Millione hei sie zum Fänschter us gschosse, damit es paar Uniformierti im Allmänd-Stadion sich sälber chöi fiire.»
Aschi: «Halt: D’Hälfti hei Privati bytreit …»
Rolf: «Wo ihres Gäld ou gschyder dr Caritas gschpändet hätti. Und überhoupt: Ou 600 000 Stutz isch für so ne Trachteaalass doch no z’viel. Da chasch grad so guet d’Bärnersenne im Bäre z’Münchewiler ga luege, und hesch erscht no meh z’lache.»
Pöilu: «Dr Rolf het scho rächt. Ds eifache Volk het vor dr Allmänd mid Raggetli und Frouefürz demonstriert…»
Aschi: «Das si gwüss d’SCB-Fans gsy, wo gmeint hei, es sygi Mätsch…»
Pöilu: «Und überhoupt: Uniforme hei mir sowieso gnueg i dene Tage vor Wiehnacht. Gäng meh Bahnpolizischte, d’Securitas z’Bärn im Loeb, Politesse, wo dr Wiehnachtsverkehr regle, und us Irak gsehsch ou nume ging Uniforme.»
Rolf: «Und zwüschedüre no n’e Presidänt mit eme Truthahn us Plastigg.»
Röbu: «Apropos Uniforme: Lueg zum Fänschter use, Pöilu. Si das nid grad zwöi Tschugger, wo dert gäge dys falsch parkierte Outo loufe und dr eint dervor jitz es Blöckli us dr Täsche zieht?»
Pöilu: «Nei, i gloub’s nid. Die verdammte Halungge… Säg nid, die wei mir jitz e Tag vor Wiehnachte no n’e Buessezettel … Aber halt: D’Tschugger hei doch nid söttig Hüet! Das isch doch …»
Rolf: «D’Heilsarmee.»
Urs Haenni, Oorespitzer
