«Verdammti Frächheit: Nume schnäll uusgstige für a Bancomat, churz müesse warte, wil zwöi vor mir aagstande si, chume zrügg zum Outo, und scho isch so n’e Fötzel unter em Schybewüscher. Vom Tschugger natürlich wyt und breit kei Spur me.» «Isch es ächt dr Portugies gsy, wo kontrolliert het? Früecher bim Chrattinger isch es doch no andersch gsy. Dä isch zmingscht no schnäll i d’Bankhalle cho luege, und het eim gseit, me söll doch umparkiere, süsch müessi är e Buess gäh.» «Ja, ja, dr Polizischt Chrattinger. Mängisch het är eim zwar uf offener Strass verhornet, aber me het emu mit ihm ging no chönne rede. Jitz, wo n’är nüm da isch, merke mir ersch, was mir a ihm gha hei.» «I ha bi ihm no d’Uushebig gmacht. Dä isch mit so neme Yfer derby gsy, dass wo n’i ds Sportabzeiche gmacht ha, de Chrattinger so
gstrahlet het, als öb är sälber de Zwölfminutelouf gmacht hetti und d’Schtange uf g’chlätteret wäri.»
«Dori, no n’es Chübeli.»
«Irgendwie typisch: Jitz, wo dr Chrattinger i d’Pension geit, gits bi dr Uushebig Samespänd statt Zwölfminüteler, und d’Chlätterschtange verschwinde ou langsam vo de Schuelhusplätz.» «Isch doch schad: E Chlätterschtange isch irgendwie es Stück Schwyzer Kulturguet. Wil’s bi dr Uushebig verlangt gsy isch, si d’Chlätterschtange quer dür d’Schwyz es Symbol für üsi Wehrbereitschaft gsy.» «Wägem Chlättere hei’s dänk söttig Affe wie Du im Militär ou am wytischte bracht.» «Frächheit: Du mit dim Ranze bisch dänk gar nie bis zum Strichli ufechoo, und d Meitschi hei di nähär uusglachet.» «Ganz im Gägeteil: Grad will i im Turnunterricht am schnällste d Schtange ufe g’chlätteret bi, han’i die flottischte Modi als Solischätz chönne haa.» «Wie hei sich die Zyte doch g’änderet! Dä Herbscht ha n’i Di emu nüm a dr Chlätterschtange gseh, sondern mit dr Männerriege nach Altavilla ga Nordic Walke.» «Das stimmt: Mi Frou het de Rolf denn ou grad gseh. Sie het d’Männerriege g’chrüzt, wo sie bi nere Läseraktion mit em Murtebieter isch ga Nordic-Walke.» «Gwüss si d’Chüngelizüchter denn ou no grad uf eme Nordic-Walking-Vereinsusfluug im Murteholz gsy, und am Morge druf hei sich d’Manager vo dr Winterthur-Versicherig im Chablais troffe, zum bim Nordic-Walke ihre Füehrigs-Kompetänze z’verbessere.» «Lueget es mal zum Fänschter use. Isch das nid dr AHV-Räntner Chrattinger, wo geit ga luege, wär alles e Buessezettel überchoo hett? Aber säget einisch: Werum i aller Wält louft är derby mit eme Paar Schystöck ume?»
