Autor: Urs Haenni, Oorespitzer
Rolf: «Das isch es Mal öppis ganz Nöis: mini drü Stammtisch-Brüeder als grundsolidi Sozialischte!»
Röbu: «Sozialischt? Wie chunnsch ächt uf so n’e Chutzemischt? I wähle scho sit Jahr und Tag d’Buurepartei, und dass dr Pöilu als Schrübliverchöifer und dr Aschi als Militärchopf links oder nätt sötte sy, das wär ja fascht scho revolutionär.»
Rolf: «I meine dänk nume, will mir vermuetlich zum erschte Mal am 1. Mai üs scho am Vormittag zu n’eme Bier träffe. Süsch müesst dir doch am Tag vo dr Arbeit ging schaffe.»
Aschi: «Das isch dänk nume wäg dr Uuffahrt. Das zeigt höchschtens, dass mir gueti Chrischte si, und nid nach Züri uf d’Strass göh ga randaliere.»
Pöilu: «Überhoupt, mir si doch hie z’Murte vo 1.-Mai-Kundgäbige so wyt ewäg, wie d’Fuessball-Nati vom EM-Final. Statt Strasseschlachte hei mir grad mal dr Maimärit am Sunntig.»
Aschi: «Ja, und villecht no dr Maibummel vo de Samariter. Aber die nähme derby kei Pflaschterstei mit.»
Pöilu: «Dori, da druf no n’es Chübeli!»
Rolf: «Da isch es vor vierzg Jahr no ganz anders gsy.»
Aschi: «Möcht gar nid wüsse, wär alles was für ne 68er-Vergangeheit het. Dr Bundesrat Löiebärger als Chaot, d’Micheline füdliblutt i dr Studäntezytig, und vermuetlich het sogar dr Blocher es Chnübi Hasch groucht.»
Rolf: «Da muesch gwüss nid über Murte useluege. Sicher het zmingscht d’Stadtpresidäntin Fäldmaa e Che-Guevara-Chläber uf em Schuelsack gha, dr Prefet Lehmaa villecht d’Uufklärigs-Bildli us em Bravo i dr Schublade, und üse letscht Staatsrat, dr Housi Bächler, irgendwo no n’e Egge Hanf aapflanzt.»
Pöilu: «Dr Schueldiräktor Marti isch öppe mit eme bluemig bemalte VW-Bus dür Europa greist.»
Röbu: «Gwüss isch üses Dori da no im Miniröckli als Bluemechind vo eire Hippie-Kommune zur andere zoge. Und statt Chübeli het sie Würfelzucker mit LSD-Tropfe serviert.»
