Michel nimmt einen kräftigen Schluck, schüttelt den Kopf und stöhnt: Mier feele ifach d Leitplanke im Lääbe.Patrick: Me! Loset amaau de Mischù. Itz isch er nüme ganz ùf de Schyba!Franz: Was isch loos, Mischù?Michel: Moou, eerlich. Ma wiis gaar nüme, a waas as mù sich cha orientiere: Brasilie chùnt nüme Wäutmiischter, de Polo Hofer isch im Spitaau ù d Liechtatleete schlücke mee Teschtoschteroon aus wier Pastis.Hugo: U de d Wölofaarer!Michel: Äbe gseesch. Dass d Queerfeldein-Faarer nit suber sy, da dra ha mi gwaanet. Aber itz isch o chumm mee a Straassefaarer subera.Patrick: Dasch emù nüüt Nüüs, oder?Michel: Schoo, aber i ha my Grinn no gäär i de Stäärne. U itz chan i mi nüme na dene richte: De Pluto isch ki jùschta Planeet mee. Er leert sein Pastis mit einem Schluck. Lisi, no as Pastis.Hugo: Aber wenigschtens hii die Aschtronoome demokraatisch chene abstüme, ob de Pluto no a Planeet isch oder nit.Franz: Wier chenti daas oo: Wär isch defüür, dass mer no as Pastis bechäme?Alle strecken auf: Iistümig!Hugo: Wär isch defüür, dass hütt schöön Wätter isch?Alle strecken auf: Iistümig!Franz: Wär isch defüür, dass d Schwyz Wäutmiischter chùnt?Hugo laut: Iistümig!Patrick: Wär isch defüür, dass de Robbie Williams schwuu isch?Hugo lauter: Iistümig!Patrick: Wär isch defüür, dass de Mischù nüme truurig isch?Michel schreiend: Iistümig!Patrick: Dù Mischù, itz giits der ùmmi guet, he. Wy isch daas gsyy mit de Leitplanke, wa der feele?Lisi bringt Martini: Sorry, i ha kis Pastis mee. U chentet er nit an a andera Tüsch ga hocke. As wii re daa cho jasse.Franz, plötzlich kleinlaut: Asch Zyt fùr hiim ga z ggùgge, ob d Nigle gwachse hii. De Mischù het rächt: Asch nüme wy früer.
Christian Schmutz, Oorespitzer