Rosemarie, no vier Balong Wyyssa, bitte. Zyt wa de

Rosemarie, no vier Balong Wyyssa, bitte. Zyt wa de Blick nüü dehäär chùnnt, wiis mù am Kiosk nüme ùf wela Uushang as mù sou gùgge. Sy hiigi schyns wäge de Froue das knaliga Gäub gäge das Paschtelliga gwächslet.Di herte Farbe chäme schyns nid aan by de Lääserine. Itz chùnnt endlich beschtätigt, was myer dyer scho lang ging sääge: Dù mit dyne farbige Hawaii-Hemleni büsch bi de Froue chanceloos. Dä Trend hät d’Frybùrgera scho lang gsetzt: Im Uushang jaa nid uuffalle. Hii sich ächt di by de Frybùrgera oo a so vöu überliit? De Hammer isch, dass im Blick ds Girl ùf de Syta 3 verschwùne isch. Wär chùùft de de Blick itz no? Fasch verschwùne, häsch wele sääge. Ab itz chäme dy Girls in a Gschücht yybùnne ù nüme a so plùmp dehäär. Aus ob a blùtti Brùscht a Gschücht brùchti. Das isch doch schynnheilig taa.O dä Schritt hi myer sicher de Froue z verdanke. Wo füürt das hii? De Blick oni Syta-3-Girl isch eppa glyych lengwilig wy üsi Rùndi oni Balong Wyyssa.Ma wetti fasch miine, ùs em Blick gäbenes as Froueheftli.Isch das a wytera Schritt va de Emanzypazion? Zersch törfe si ga stömme… …nay chö si oo i ds Mylytär… …d Regyerig ds Zürich ùne isch meerhiitlich wyyblich… …ù itz näme si o no üsi Lieblingszytùng.As giit nüme lang ù ma
gseet ùf de Syta 3 blùti Mane.Potz Wärchtigshemmli, so wit chùnnts no.Ù was blibt üs Mane am Endi? Ds Fäudschyesse? D Scheffposchte? D Härzinfarkte? I gloobe, myer müesse üüs mau drùf beschränke, dass myer am Stammtisch ùnder üüs blyybe.Das isch zwar a schwacha Trooscht, aber ging no Grùnd gnueg, ùf das ay no iis z nää. Stoosse mer aan ùf besseri Zytte.